عقيدة أدانتها الكنيسة الكاثوليكية. أول ما الكنيسة الكاثوليكية قبضت على سلطة بجد بناء على اعتراف الملوك والأباطرة بيها، نسيت كل الاضطهاد اللي عانى منه مؤسسيها. وأول ما بقت مسلحة بنفوذ قوي من الملوك واللوردات، بدأت حرب دموية ما فيهاش رحمة ضد الناس اللي مش قابلين ينحنوا لأوامرها.
مفهوم الهرطقة من الموسوعة الأناركية
سيباستيان فاور*
ترجمة بالعامية المصرية لحسين الحاج
* سيباستيان فاور: (1858–1942) كاتب وناشط أناركي فرنسي
مقدمة المترجم:
لما كنت باكتب مع شهاب الخشاب مقالة الريزوم في سلسلة موسوعة الملل واخترنا مثال الموسوعات لشرح مفهوم الريزوم، افتكرت من ضمن الموسوعات موسوعة مجهولة اسمها موسوعة اﻷناركية. الموسوعة اﻷناركية عمل ضخم من أربع مجلدات أسسه اﻷناركي الفرنسي سيباستيان فاور وشارك في تأليفه أناركيين كتير منهم اﻷناركي الروسي فولين واﻷناركي اﻹيطالي إيريكو مالاتسيتا. الموسوعة دي فيها مقالات متنوعة جدًا عن أغلب اﻷسئلة الفلسفية والسياسية والاجتماعية من وجهة النظر اﻷناركية.
عمل زي دا بيثبت مدى ثراء الفلسفة اﻷناركية وقد إيه هي واسعة بوسع الحياة نفسها (ودا يرجعنا تاني لمفهوم الريزوم)، واللي بيثبت دا أكتر إن مشروع الموسوعة نفسه أعيد إحياؤه على شبكة اﻹنترنت وظهرت تحته مقالات عن مفاهيم جديدة زي اﻹسلاموفوبيا.
النهاردا مش بنقدم مفهوم جديد في موسوعة الملل، إنما بنقدم مفهوم الهرطقة من الموسوعة اﻷناركية بترجمة للعامية المصرية، واللي هي في عرف كتير من المترجمين والقراء العرب على حدٍ سواء شكل من أشكال الهرطقة اللغوية: مخالفة واضحة وصريحة لتقاليد الثقافة العربية الرفيعة بتحصل عليها حروب ثقافية كبيرة. دي مش أول تجربة في الترجمة للعامية تحصل هنا، ولحسن الحظ إننا لما جربناها قبل كدا (برضه مع شهاب) كانت بتتكلم عن اللعب!
الهرطقة:
(من اليونانية hairesis، مشتقة من hairen بمعنى الاختيار).
عقيدة أدانتها الكنيسة الكاثوليكية. أول ما الكنيسة الكاثوليكية قبضت على سلطة بجد بناء على اعتراف الملوك والأباطرة بيها، نسيت كل الاضطهاد اللي عانى منه مؤسسيها. وأول ما بقت مسلحة بنفوذ قوي من الملوك واللوردات، بدأت حرب دموية ما فيهاش رحمة ضد الناس اللي مش قابلين ينحنوا لأوامرها.
الخمستاشر قرن اللي حكمت الكنيسة من خلالها أوروبا كسيد بدون منازع ما كانتش إلا سلسلة طويلة من الجرايم اللي تم ارتكابها باسم الدين. كان هناك مجازر حقيقية لشعوب كاملة. أكتر المجازر دي شهرة: مجزرة كاثار Albigensians واللي هي فرقة مسيحية "مهرطقة" ظهرت في جنوب فرنسا في القرن 11 واتقضى عليها في القرن 13 بحملة صليبية مدعومة من محاكم التفتيش، وحروب الإصلاح بين الكاثوليك والبروتستانت بعد ظهور حركة الإصلاح الديني البروتستانتية، ومجزرة القديس بارثولوميو سنة 1572 وهي مجزرة ارتكبتها حشود تابعة للكنيسة الكاثوليكية ضد البروتستانت الفرنسيين وبأمر من الملك، اتسمت باسم القديس بارثولوميو لأنها حصلت ليلة الاحتفال بعيده، ومجزرة الأبرياء في السيفان dragonnades of the Cevennes ودي مجازر ضد البروتستانت الفرنسيين في القرن 17 انتهت بقتل وتهجير سكان مدن ومناطق كاملة في سلسلة جبال السيفان.
أمر مجلس فيرونا سنة 1183 أساقفة لومباردي بتطبيق "العدالة" على الهراطقة دول اللي رفضوا إنهم يغيروا عقيدتهم. بعد كدا بوقت قصير اتأسست محكمة سرية: هي محاكم التفتيش بغرض ملاحقة الهراطقة ومعاقبتهم. لحد القرن 19 بعتت المحكمة دي أشخاص شكت أنهم هراطقة عشان يتحرقوا على الصليب بعد تعريضهم لتعذيب رهيب. في عام 1766 قطعوا راس نبيل فرنسي عنده 19 سنة اسمه فرانسوا جان لوفيفر دي لا بار chevalier de La Barre وحرقوا جسمه بتهمة عدم تحية موكب ديني وللشك بإنه شوّه صليب.
في الخمسين سنة الأخيرة خسرت الكنيسة كتير من نفوذها -إلا إسبانيا اللي لسه بتنشر الإرهاب الديني- واتنزع سلاحها بالكامل ضد الهرطقة ودا شيء كويس. كل اللي عمل خطوة لقدام كانت الكنيسة قبل كدا اعتبرته هرطقة. ما شفناش اللي حصل في عالم الرياضيات الإيطالي جاليليو عشان ألف كتاب شرح فيه أن الشمس هي مركز المنظومة الشمسية ومش الأرض وإن الأرض بتدور حول الشمس وإنها بتعكس نورها زي باقي الكواكب؟ ما شفناش الراجل اللي عنده 70 سنة وغصبت عليه محاكم التفتيش يشجب -وهو راكع على ركبتيه الاتنين- هرطقته سنة 1633 ومات أعمى بسبب 9 سنين سجن اتحكم عليه بيها؟
شكلت الكنيسة في مجلس ترنت (1545 – 1563) هيئة لجمع الأدلة هدفها فحص الكتب المطبوعة وإدانتها لو اتحكم عليها بإنها خطيرة. لحد القرن 19 كان معنى حكمها بالإدانة هو حرق الكتاب اللي بتدينه.. وأحيانًا حرق الكاتب نفسه! الهيئة دي لسه موجودة لكن لحسن الحظ أحكامها ما لهاش أي مفعول.
زي ما شفنا الهرطقة فيها حاجة كبيرة من الحقيقة. واللي أكتر من كدا، التعريف اللي بتقدمه المعاجم البرجوازية بيأكد بما فيه الكفاية الطبيعة الثورية للهرطقة. "رأي غلط أو سخيف"، دا اللي اتكتب عنها في القاموس الفرنسي لاروس Larousse. بس مش أصحاب الامتيازات بيقيموا بالطريقة دي آراء المفكرين اللي استنتجوا أن الثورة وإعادة تنظيم المجتمع من أساسه حاجة ضرورية؟ وبالطريقة دي كل الأحزاب السياسية بتعتبر الأناركية برضه هرطقة، لأنها بتكشف ضرر وازدواجية كل الحاجات اللي إسمها عقائد من كل الألوان. لكن الهرطقة هي اللي هتغلب في النهاية واللي هتقوم بتدمير كل وصايا كل الكنايس الدينية والسياسية.
